ED ਦਾ ਵੱਡਾ ਖੁਲਾਸਾ : ਖਾੜੀ ਦੇਸ਼ਾਂ ਤੋਂ ਹਵਾਲਾ ਰਾਹੀਂ ਆਈ ਕਰੋੜਾਂ ਰੁਪਏ ਦੀ ਨਕਦੀ

ਨਵੀਂ ਦਿੱਲੀ: ਕੇਂਦਰੀ ਜਾਂਚ ਏਜੰਸੀ ਈਡੀ ਨੇ PFI ਨਾਲ ਜੁੜੇ 5 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਸਾਰੇ ਮੁਲਜ਼ਮ ਪਾਬੰਦੀਸ਼ੁਦਾ ਜਥੇਬੰਦੀ ਪੀਐਫਆਈ ਵਿੱਚ ਵੱਖ-ਵੱਖ ਅਹੁਦਿਆਂ ’ਤੇ ਰਹੇ ਸਨ, ਜੋ ਵਿਦੇਸ਼ੀ ਹਵਾਲਾ ਰਾਹੀਂ ਮਿਲੇ ਕਰੋੜਾਂ ਰੁਪਏ ਦੇਸ਼ ਵਿਰੋਧੀ ਗਤੀਵਿਧੀਆਂ ਵਿੱਚ ਵਰਤ ਰਹੇ ਸਨ। ਇਨ੍ਹਾਂ ਸਾਰਿਆਂ ਦੀ ਪਛਾਣ ਈਐਮ ਅਬਦੁਲ ਰਹਿਮਾਨ, ਅਨੀਸ ਅਹਿਮਦ, ਅਫਸਰ ਪਾਸ਼ਾ, ਏਐਸ ਇਸਮਾਈਲ ਅਤੇ ਮੁਹੰਮਦ ਸ਼ਕੀਫ ਵਜੋਂ ਹੋਈ ਹੈ।

ਦਰਅਸਲ ਪਾਬੰਦੀਸ਼ੁਦਾ ਸੰਗਠਨ PFI ਨੂੰ ਲੈ ਕੇ ED ਨੇ ਵੱਡਾ ਖੁਲਾਸਾ ਕੀਤਾ ਹੈ। ਹਵਾਲਾ ਰਾਹੀਂ ਖਾੜੀ ਦੇਸ਼ਾਂ ਤੋਂ ਕਰੋੜਾਂ ਰੁਪਏ ਦੀ ਨਕਦੀ ਆਈ ਹੈ। ਇਹ ਨਕਦੀ ਕਾਲੇ ਧਨ ਨੂੰ ਚਿੱਟੇ ‘ਚ ਬਦਲਣ ਲਈ ਸਮਰਥਕਾਂ ਦੇ ਖਾਤਿਆਂ ‘ਚ ਜਮ੍ਹਾ ਕਰਵਾਈ ਗਈ ਹੈ। ਜਿਸ ਨੂੰ ਬਾਅਦ ਵਿੱਚ PFI ਖਾਤੇ ਵਿੱਚ ਟਰਾਂਸਫਰ ਕਰ ਦਿੱਤਾ ਗਿਆ। ਤੁਹਾਨੂੰ ਦੱਸ ਦੇਈਏ ਕਿ ਖਾੜੀ ਦੇਸ਼ਾਂ ਵਿੱਚ PFI ਦੇ ਹਜ਼ਾਰਾਂ ਸਮਰਥਕ ਹਨ। ਦਾਨ ਦੇ ਨਾਂ ‘ਤੇ ਵਿਦੇਸ਼ਾਂ ‘ਚ ਕਰੋੜਾਂ ਰੁਪਏ ਜਮ੍ਹਾ ਕਰਵਾਏ ਗਏ।

2 ਮਈ, 2018 ਨੂੰ ਦਰਜ ਕੀਤੇ ਗਏ ਈਸੀਆਈਆਰ ਵਿੱਚ, ਸਾਰੇ ਪੰਜ ਮੁਲਜ਼ਮਾਂ ਤੋਂ ਈਡੀ ਨੇ ਹਾਲ ਹੀ ਵਿੱਚ 19 ਦਸੰਬਰ ਨੂੰ ਦਿੱਲੀ ਦੀ ਤਿਹਾੜ ਜੇਲ੍ਹ ਵਿੱਚ ਪੁੱਛਗਿੱਛ ਕੀਤੀ ਸੀ। ਇਹ ਜਾਂਚ 3 ਦਸੰਬਰ 2020 ਨੂੰ PFI ਟਿਕਾਣਿਆਂ ‘ਤੇ ਛਾਪੇਮਾਰੀ ਦੌਰਾਨ ਬਰਾਮਦ ਕੀਤੇ ਗਏ ਸੰਗਠਨ ਦੇ ਵੱਖ-ਵੱਖ ਬੈਂਕ ਖਾਤਿਆਂ ਦੇ ਵੇਰਵਿਆਂ ਦੇ ਆਧਾਰ ‘ਤੇ ਕੀਤੀ ਗਈ ਸੀ।

ਸਾਰੇ ਮੁਲਜ਼ਮ ਵੱਖ-ਵੱਖ ਸ਼ਹਿਰਾਂ ਵਿੱਚ ਸਥਿਤ ਸੰਸਥਾ ਦੇ ਬੈਂਕ ਖਾਤਿਆਂ ਦੇ ਦਸਤਖਤ ਕਰਨ ਵਾਲੇ ਅਧਿਕਾਰੀ ਸਨ। ਇਨ੍ਹਾਂ ਸਾਰਿਆਂ ਤੋਂ ਬੈਂਕ ਖਾਤਿਆਂ ‘ਚ ਕਰੋੜਾਂ ਰੁਪਏ ਦੇ ਮਨੀ ਟ੍ਰੇਲ ਬਾਰੇ ਪੁੱਛਗਿੱਛ ਕੀਤੀ ਗਈ ਸੀ ਪਰ ਤਸੱਲੀਬਖਸ਼ ਜਵਾਬ ਨਾ ਦੇਣ ਅਤੇ ਤੱਥਾਂ ਨੂੰ ਛੁਪਾਉਣ ‘ਤੇ ਇਨ੍ਹਾਂ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਸੀ।