ਜਾਪਾਨ ਤੋਂ ਭਾਰਤ ਖ਼ਰੀਦੇਗਾ 6 ਬੁਲੇਟ ਟਰੇਨਾਂ

ਅਹਿਮਦਾਬਾਦ ਅਤੇ ਮੁੰਬਈ ਵਿਚਕਾਰ 508 ਕਿਲੋਮੀਟਰ ਲੰਬੇ ਬੁਲੇਟ ਟਰੇਨ ਕੋਰੀਡੋਰ ‘ਤੇ ‘ਸੀਮਤ ਸਟਾਪ’ ਅਤੇ ‘ਆਲ ਸਟਾਪ’ ਸੇਵਾਵਾਂ ਹੋਣਗੀਆਂ। ਸੀਮਤ ਸਟਾਪਾਂ ਵਾਲੀਆਂ ਰੇਲਗੱਡੀਆਂ ਮੁੰਬਈ ਅਤੇ ਅਹਿਮਦਾਬਾਦ ਵਿਚਕਾਰ ਦੀ ਦੂਰੀ ਸਿਰਫ਼ ਦੋ ਘੰਟਿਆਂ ਵਿੱਚ ਪੂਰੀ ਕਰਨਗੀਆਂ।
ਨਵੀਂ ਦਿੱਲੀ : ਭਾਰਤ ਇਸ ਮਹੀਨੇ ਦੇ ਅੰਤ ਤੱਕ ਜਾਪਾਨ ਤੋਂ E5 ਸੀਰੀਜ਼ ਦੀਆਂ ਪਹਿਲੀਆਂ ਛੇ ਬੁਲੇਟ ਟਰੇਨਾਂ ਖਰੀਦਣ ਲਈ ਸੌਦੇ ‘ਤੇ ਮੋਹਰ ਲਗਾ ਦੇਵੇਗਾ। ਇਸ ਨਾਲ 2026 ‘ਚ ਜੂਨ-ਜੁਲਾਈ ਮਹੀਨੇ ‘ਚ ਗੁਜਰਾਤ ‘ਚ ਪਹਿਲੀ ਟਰੇਨ ਸ਼ੁਰੂ ਕਰਨ ਦੀ ਦਿਸ਼ਾ ‘ਚ ਰੇਲਵੇ ਦਾ ਭਰੋਸਾ ਵਧਿਆ ਹੈ। ਸੂਤਰਾਂ ਨੇ ਦੱਸਿਆ ਕਿ ਨੈਸ਼ਨਲ ਹਾਈ ਸਪੀਡ ਰੇਲ ਕਾਰਪੋਰੇਸ਼ਨ ਲਿਮਟਿਡ (ਐੱਨ.ਐੱਚ.ਐੱਸ.ਆਰ.ਸੀ.ਐੱਲ.) ਇਸ ਸਾਲ 15 ਅਗਸਤ ਤੱਕ ਰੇਲ ਗੱਡੀਆਂ ਅਤੇ ਓਪਰੇਟਿੰਗ ਸਿਸਟਮਾਂ ਦੀ ਖਰੀਦ ਸਮੇਤ ਸਾਰੇ ਠੇਕਿਆਂ ਲਈ ਬੋਲੀ ਲਗਾਏਗੀ।

ਅਹਿਮਦਾਬਾਦ ਅਤੇ ਮੁੰਬਈ ਵਿਚਕਾਰ 508 ਕਿਲੋਮੀਟਰ ਲੰਬੇ ਬੁਲੇਟ ਟਰੇਨ ਕੋਰੀਡੋਰ ‘ਤੇ ‘ਸੀਮਤ ਸਟਾਪ’ ਅਤੇ ‘ਆਲ ਸਟਾਪ’ ਸੇਵਾਵਾਂ ਹੋਣਗੀਆਂ। ਸੀਮਤ ਸਟਾਪਾਂ ਵਾਲੀਆਂ ਰੇਲਗੱਡੀਆਂ ਮੁੰਬਈ ਅਤੇ ਅਹਿਮਦਾਬਾਦ ਵਿਚਕਾਰ ਦੀ ਦੂਰੀ ਸਿਰਫ਼ ਦੋ ਘੰਟਿਆਂ ਵਿੱਚ ਪੂਰੀ ਕਰਨਗੀਆਂ। ਜਦਕਿ, ਦੂਜੀ ਸੇਵਾ ਲਗਭਗ 2 ਘੰਟੇ 45 ਮਿੰਟ ਲਵੇਗੀ।

ਅਧਿਕਾਰੀਆਂ ਨੇ ਕਿਹਾ ਕਿ ਜਨਵਰੀ ਤੱਕ ਪ੍ਰੋਜੈਕਟ ‘ਤੇ ਸਮੁੱਚੀ ਪ੍ਰਗਤੀ ਲਗਭਗ 40% ਹੈ। ਗੁਜਰਾਤ ਵਿੱਚ ਤਰੱਕੀ 48.3% ਤੋਂ ਵੱਧ ਹੈ। ਮਹਾਰਾਸ਼ਟਰ ਇਸ ਮਾਮਲੇ ‘ਚ ਪਿੱਛੇ ਹੈ। ਉਥੇ ਸਿਰਫ਼ 22.5 ਫ਼ੀਸਦੀ ਕੰਮ ਹੀ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ ਇੱਕ ਸਾਲ ਵਿੱਚ ਇਸ ਪ੍ਰੋਜੈਕਟ ਵਿੱਚ 100 ਕਿਲੋਮੀਟਰ ਤੋਂ ਵੱਧ ਵਾਇਆਡਕਟ ਪੂਰੇ ਕੀਤੇ ਜਾ ਚੁੱਕੇ ਹਨ। ਪਿਛਲੇ ਇੱਕ ਸਾਲ ਵਿੱਚ ਵੱਖ-ਵੱਖ ਨਦੀਆਂ ‘ਤੇ ਛੇ ਪੁਲ ਬਣ ਚੁੱਕੇ ਹਨ। ਗੁਜਰਾਤ ਵਿੱਚ 20 ਪੁਲਾਂ ਵਿੱਚੋਂ ਸੱਤ ਪੂਰੇ ਹੋ ਚੁੱਕੇ ਹਨ।

ਰੇਲਵੇ ਮੰਤਰਾਲੇ ਦੇ ਇੱਕ ਅਧਿਕਾਰੀ ਨੇ ਕਿਹਾ, “ਹਾਲੇ ਦੇ ਮਹੀਨਿਆਂ ਵਿੱਚ ਮਹਾਰਾਸ਼ਟਰ ਵਿੱਚ ਮਹੱਤਵਪੂਰਨ ਤਰੱਕੀ ਹੋਈ ਹੈ। ਰਾਜ ਪ੍ਰਸ਼ਾਸਨ ਨੇ ਸਾਰੇ ਜ਼ਿਲ੍ਹਾ ਕੁਲੈਕਟਰਾਂ ਨੂੰ ਇਸ ਮਹੀਨੇ ਦੇ ਅੰਤ ਤੱਕ ਜ਼ਮੀਨ ਸੌਂਪਣ ਦਾ ਕੰਮ ਪੂਰਾ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਇੱਕ ਸੂਤਰ ਨੇ ਕਿਹਾ, “ਮਹਾਰਾਸ਼ਟਰ ਵਿੱਚ ਪਿਛਲੀ ਸਰਕਾਰ ਦੇ ਕਾਰਨ ਅਸੀਂ ਬਹੁਤ ਸਮਾਂ ਗੁਆ ਦਿੱਤਾ ਹੈ। ਅਸੀਂ ਇਸਦੀ ਭਰਪਾਈ ਕਰਨ ਲਈ ਕੰਮ ਕਰਨ ਲਈ ਉਤਸੁਕ ਹਾਂ।”