ਰੈਸਟੋਰੈਂਟ ਮਾਲਕ ਬਿੱਲੀਆਂ ਨੂੰ ਮਾਰ ਕੇ ਗਾਹਕਾਂ ਨੂੰ ਸੂਪ ਪਰੋਸਦਾ ਸੀ, ਹੁਣ ਪਛਤਾ ਰਿਹਾ ਹੈ

ਵੀਅਤਨਾਮ : ਤੁਸੀਂ ਚਿਕਨ ਜਾਂ ਵੈਜ ਸੂਪ ਬਾਰੇ ਤਾਂ ਸੁਣਿਆ ਹੋਵੇਗਾ ਪਰ ਬਿੱਲੀਆਂ ਦੇ ਮੀਟ ਦੇ ਸੂਪ ਬਾਰੇ ਸੁਣਿਆ ਨਹੀਂ ਹੋਵੇਗਾ। ਵੀਅਤਨਾਮ ਦਾ ਇੱਕ ਪੁਰਾਣਾ ਰੈਸਟੋਰੈਂਟ ਸਾਲਾਂ ਤੋਂ ਆਪਣੇ ਗਾਹਕਾਂ ਨੂੰ ਬਿੱਲੀਆਂ ਦਾ ਸੂਪ ਪਰੋਸਦਾ ਸੀ। ਇਸ ਲਈ ਉਹ ਹਰ ਮਹੀਨੇ ਘੱਟੋ-ਘੱਟ 300 ਬਿੱਲੀਆਂ ਨੂੰ ਮਾਰਦਾ ਸੀ। ਹੁਣ ਰੈਸਟੋਰੈਂਟ ਮਾਲਕ ਆਪਣੀ ਇਸ ਕਾਰਵਾਈ ‘ਤੇ ਪਛਤਾ ਰਿਹਾ ਹੈ। ਹੁਣ ਉਸ ਨੇ ਆਪਣੇ ਰੈਸਟੋਰੈਂਟ ਨੂੰ ਤਾਲਾ ਲਾ ਦਿੱਤਾ ਹੈ। ਉਸ ਨੇ ਰੈਸਟੋਰੈਂਟ ਵਿੱਚ ਮਾਰਨ ਲਈ ਰੱਖੀਆਂ 20 ਤੋਂ ਵੱਧ ਬਿੱਲੀਆਂ ਨੂੰ ਗੋਦ ਲੈਣ ਲਈ ਕੇਂਦਰ ਵਿੱਚ ਭੇਜਿਆ ਹੈ।

ਵੀਅਤਨਾਮ ਦੀ ਹਿਊਮਨ ਸੋਸਾਇਟੀ ਇੰਟਰਨੈਸ਼ਨਲ ਨੇ ਕਿਹਾ ਕਿ ਦਸੰਬਰ ਦੀ ਸ਼ੁਰੂਆਤ ਵਿੱਚ, ਰੈਸਟੋਰੈਂਟ ਦੇ ਮਾਲਕ ਫਾਮ ਕੁਓਕ ਡੋਨ ਨੇ ਆਪਣੇ ਗੀਆ ਬਾਓ ਰੈਸਟੋਰੈਂਟ ਦੇ ਬਾਹਰ ਬਿੱਲੀ ਦੇ ਮੀਟ ਦੇ ਸੂਪ ਦੇ ਇਸ਼ਤਿਹਾਰ ਨੂੰ ਤੋੜਨ ਤੋਂ ਬਾਅਦ ਆਪਣੇ ਰੈਸਟੋਰੈਂਟ ਨੂੰ ਤਾਲਾ ਲਗਾ ਦਿੱਤਾ ਸੀ ।ਮੈਟਰੋ ਯੂਕੇ ਦੀ ਰਿਪੋਰਟ ਦੇ ਅਨੁਸਾਰ, ਰੈਸਟੋਰੈਂਟ ਮਾਲਕ ਫਾਮ ਆਪਣੀ ਗਲਤੀ ‘ਤੇ ਪਛਤਾ ਰਿਹਾ ਹੈ ਅਤੇ ਹੁਣ ਉਸਨੇ ਅਜਿਹਾ ਕਰਨਾ ਬੰਦ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਰੈਸਟੋਰੈਂਟ ‘ਚ ਰੱਖੀਆਂ 20 ਬਿੱਲੀਆਂ ਨੂੰ ਆਜ਼ਾਦ ਕਰਵਾਇਆ ਗਿਆ ਹੈ। ਕੁਝ ਨੂੰ ਗੋਦ ਲੈਣ ਕੇਂਦਰ ਭੇਜਿਆ ਗਿਆ ਹੈ ਅਤੇ ਕੁਝ ਸਥਾਨਕ ਲੋਕਾਂ ਨੇ ਬਿੱਲੀਆਂ ਨੂੰ ਗੋਦ ਲਿਆ ਹੈ।

ਹੁਣ ਅਫਸੋਸ ਕਰਦੇ ਹੋਏ ਦੋ ਬੱਚਿਆਂ ਦੇ ਪਿਤਾ ਫਾਮ ਕਹਿੰਦੇ ਹਨ, “ਰੈਸਟੋਰੈਂਟ ਵਿੱਚ ਬਿੱਲੀ ਦੇ ਮੀਟ ਦਾ ਸੂਪ ਵੇਚਣ ਤੋਂ ਪਹਿਲਾਂ, ਮੈਂ ਹੋਰ ਆਮ ਖਾਣ-ਪੀਣ ਦੀਆਂ ਚੀਜ਼ਾਂ ਪਰੋਸਦਾ ਸੀ। ਹਾਲਾਂਕਿ, ਇਹ ਮੇਰੇ ਅਤੇ ਮੇਰੇ ਪਰਿਵਾਰ ਦਾ ਗੁਜ਼ਾਰਾ ਚਲਾਉਣ ਲਈ ਕਾਫੀ ਨਹੀਂ ਸੀ। ਮੈਂ ਸੂਪ ਨੂੰ ਵੇਚਣ ਬਾਰੇ ਸੋਚਿਆ। ਉਸ ਸਮੇਂ, ਸਾਡੇ ਖੇਤਰ ਵਿੱਚ ਅਜਿਹਾ ਕੁਝ ਵੀ ਉਪਲਬਧ ਨਹੀਂ ਸੀ।”

ਹਿਊਮਨ ਸੋਸਾਇਟੀ ਇੰਟਰਨੈਸ਼ਨਲ ਦੇ ਅਨੁਸਾਰ, ਹਰ ਸਾਲ ਵੀਅਤਨਾਮ ਵਿੱਚ ਚੋਰੀ ਹੋਏ ਪਾਲਤੂ ਜਾਨਵਰਾਂ ਅਤੇ ਅਵਾਰਾ ਸਮੇਤ ਲਗਭਗ 10 ਲੱਖ ਬਿੱਲੀਆਂ ਨੂੰ ਮਾਰਿਆ ਜਾਂਦਾ ਹੈ। 37 ਸਾਲਾ ਰੈਸਟੋਰੈਂਟ ਦੇ ਮਾਲਕ ਨੇ ਕਿਹਾ ਕਿ ਉਹ ਬਿੱਲੀਆਂ ਨੂੰ ਡੰਡੇ ਨਾਲ ਮਾਰ ਕੇ ਫੜ ਕੇ ਪਾਣੀ ਦੀ ਬਾਲਟੀ ਵਿੱਚ ਡੁਬੋ ਦਿੰਦਾ ਸੀ। ਉਸ ਨੇ ਕਿਹਾ, “ਮੈਂ ਬਿੱਲੀਆਂ ਦਾ ਦੁੱਖ ਦੇਖ ਕੇ ਬਹੁਤ ਦੁਖੀ ਹੋਇਆ। ਉਸ ਤੋਂ ਬਾਅਦ ਮੈਂ ਇਹ ਫੈਸਲਾ ਲਿਆ ਕਿ ਇਹ ਕੰਮ ਬੰਦ ਕਰ ਦੇਣਾ ਚਾਹੀਦਾ ਹੈ।।”