ਬੰਬ ਲਗਾ ਕੇ ਮਸਜਿਦ ‘ਚ ਨਮਾਜ਼ ਅਦਾ ਕਰਨ ਗਿਆ ਸੀ ਬੇਂਗਲੁਰੂ ਧਮਾਕੇ ਦਾ ਦੋਸ਼ੀ

ਬੈਂਗਲੁਰੂ ਬਲਾਸਟ ਮਾਮਲੇ ‘ਚ NIA ਨੇ ਵੱਡਾ ਖੁਲਾਸਾ ਕੀਤਾ ਹੈ। ਏਜੰਸੀ ਨੇ ਕਿਹਾ ਹੈ ਕਿ ਇਸ ਧਮਾਕੇ ਦਾ ਸ਼ੱਕੀ ਵਿਅਕਤੀ ਬੁੱਧਵਾਰ ਨੂੰ ਬੇਲਾਰੀ ਬੱਸ ਸਟੈਂਡ ‘ਤੇ ਦੇਖਿਆ ਗਿਆ। ਸ਼ੱਕੀ ਵਿਅਕਤੀ ਵੱਖ-ਵੱਖ ਬੱਸਾਂ ਵਿੱਚ ਸਫ਼ਰ ਕਰਦੇ ਪਾਏ ਗਏ।
ਬੈਂਗਲੁਰੂ : ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ (ਐਨਆਈਏ) ਪਿਛਲੇ ਹਫ਼ਤੇ ਬੈਂਗਲੁਰੂ ਦੇ ਰਾਮੇਸ਼ਵਰਮ ਕੈਫੇ ਵਿੱਚ ਹੋਏ ਧਮਾਕੇ ਦੀ ਜਾਂਚ ਕਰ ਰਹੀ ਹੈ। ਇਸ ਧਮਾਕੇ ਦੇ ਸ਼ੱਕੀ ਬਾਰੇ ਜਾਣਕਾਰੀ ਧਮਾਕੇ ਵਾਲੇ ਦਿਨ ਹੀ ਸਾਹਮਣੇ ਆਈ ਸੀ। ਐਨਆਈਏ ਵੱਲੋਂ ਸ਼ੱਕੀ ਨੌਜਵਾਨ ਦੀ ਫੋਟੋ ਵੀ ਜਾਰੀ ਕੀਤੀ ਗਈ ਹੈ ਅਤੇ ਉਸ ਬਾਰੇ ਸੂਚਨਾ ਦੇਣ ਵਾਲੇ ਨੂੰ ਇਨਾਮ ਦੇਣ ਦਾ ਵੀ ਐਲਾਨ ਕੀਤਾ ਗਿਆ ਹੈ। ਇਸ ਦੌਰਾਨ ਹੁਣ ਧਮਾਕੇ ਦੇ ਸ਼ੱਕੀ ਨੂੰ ਲੈ ਕੇ ਵੱਡਾ ਖੁਲਾਸਾ ਹੋਇਆ ਹੈ। ਐਨਆਈਏ ਸੂਤਰਾਂ ਅਨੁਸਾਰ ਕੈਫੇ ਵਿੱਚ ਬੰਬ ਰੱਖਣ ਤੋਂ ਬਾਅਦ ਸ਼ੱਕੀ ਉਸੇ ਇਲਾਕੇ ਦੀ ਇੱਕ ਮਸਜਿਦ ਵਿੱਚ ਨਮਾਜ਼ ਅਦਾ ਕਰਨ ਗਿਆ ਸੀ।

ਐਨਆਈਏ ਦੇ ਸੂਤਰਾਂ ਅਨੁਸਾਰ ਬੀਐਮਟੀਸੀ ਦੀ ਬੱਸ ਵਿੱਚ ਆਇਆ ਸ਼ੱਕੀ ਕੈਫੇ ਵਿੱਚ ਬੰਬ ਰੱਖਣ ਤੋਂ ਬਾਅਦ ਉਸੇ ਇਲਾਕੇ ਦੀ ਇੱਕ ਮਸਜਿਦ ਵਿੱਚ ਗਿਆ। ਇਸ ਮਸਜਿਦ ਵਿੱਚ ਉਸ ਨੇ ਸ਼ੁੱਕਰਵਾਰ ਦੀ ਨਮਾਜ਼ ਅਦਾ ਕੀਤੀ। ਆਪਣੇ ਕੱਪੜੇ ਵੀ ਨੇੜੇ ਹੀ ਬਦਲ ਲਏ। ਐਨਆਈਏ ਨੇ ਇਸ ਮਸਜਿਦ ਦੇ ਨੇੜਿਓਂ ਬੇਸਬਾਲ ਕੈਪ ਜੋ ਇਸ ਸ਼ੱਕੀ ਨੇ ਪਹਿਨੀ ਸੀ ਬਰਾਮਦ ਕੀਤੀ ਹੈ।

ਇਸ ਮਾਮਲੇ ਦੀ ਜਾਂਚ ਨਾਲ ਜੁੜੇ ਸੂਤਰਾਂ ਮੁਤਾਬਕ ਬੁੱਧਵਾਰ ਨੂੰ ਬੇਲਾਰੀ ਦੇ ਬੱਸ ਸਟੈਂਡ ‘ਤੇ ਇਸ ਧਮਾਕੇ ਦਾ ਸ਼ੱਕੀ ਵਿਅਕਤੀ ਦੇਖਿਆ ਗਿਆ। ਐਨਆਈਏ ਦੀ ਟੀਮ ਉੱਥੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਹੈ। ਸ਼ੱਕੀ ਵਿਅਕਤੀ ਵੱਖ-ਵੱਖ ਬੱਸਾਂ ਵਿੱਚ ਸਫ਼ਰ ਕਰਦੇ ਪਾਏ ਗਏ। ਸੂਤਰਾਂ ਮੁਤਾਬਕ ਇਹ ਸ਼ੱਕੀ ਵਿਅਕਤੀ ਆਂਧਰਾ ਪ੍ਰਦੇਸ਼ ਦੇ ਤੁਮਾਕੁਰੂ, ਮੰਤਰਾਲਯਮ ਅਤੇ ਤੱਟਵਰਤੀ ਕਰਨਾਟਕ ਦੇ ਗੋਕਰਨਾ ਦੀਆਂ ਬੱਸਾਂ ‘ਚ ਵੀ ਸਫਰ ਕਰਦਾ ਪਾਇਆ ਗਿਆ ਹੈ।